Апісанне

Копія карты, набытай ініцыятывай MALDZIS у снежні 2024 года на сродкі беларускіх ахвярадаўцаў: Сяргея Казлоўскага, Ганны Буглаковай, Уладзіміра Гарлача і Дзмітрыя Падалінскага.

Карта ахоплівае тэрыторыю ВКЛ у межах да Люблінскай уніі 1569 года і часткова землі суседніх краін. Ініцыятарам стварэння і мецэнатам быў князь Мікалай Крыштоф Радзівіл «Сіротка», таму карта ўвайшла ў гісторыю пад ягоным прозвішчам.

Аўтарам эскіза з’яўляецца нясвіжскі гравёр Тамаш Макоўскі. Выданне 1613 года выканана галандскім гравёрам Геселем Герыцам у Амстэрдаме для майстэрні Вілема Янсана Блаў.

На карце пазначана звыш 1000 населеных пунктаў, з якіх больш за 300 — на землях сучаснай Беларусі. Да гэтага часу яна застаецца найкаштоўнейшай гістарычнай крыніцай.

 З 1631 года Радзівілаўская карта ўключалася ў атлас выдавецтва Блаў «Appendix Theatri A. Ortelii et Atlantis». Асобнік «Мальдзіса» з’яўляецца адным з першых атласных выданняў.

Арыгінал: Афарбаваная гравюра на медзі, склееная з чатырох частак. Памер карты: 74 × 75 см.

На адваротным баку асобніка «Мальдзіса» змешчаны старонкі атласа з лацінскім тэкстам «Descriptio Lithuaniae» («Апісанне Літвы») — геаграфічнае і гісторыка-культурнае апісанне ВКЛ.

Пра MALDZIS: Ініцыятыва атрымала назву ў гонар Адама Мальдзіса, які шукаў і вяртаў з забыцця страчаныя беларускія каштоўнасці і імёны. MALDZIS працягвае гэтую справу, бачачы сваю місію ва ўмацаванні вобраза Беларусі як еўрапейскай нацыі і аб’яднанні беларусаў вакол нацыянальнай ідэнтычнасці.