Апісанне

Пастаноўка пытання, пытанне і неабавязковы адказ. Страх іншага чалавека, яго ўяўлення. Умоўнасць! Страх адбіцца, пабачыць і адчуць. Палітычнае выказванне, фарс у блытаных прасторах. Крохкія спробы і дэкламацыі, упэўненыя і бессэнсоўныя. Людзі нібы ў люстэрках — люструюцца. Маўленне, пошук вымаўлення, хібная хада і праблемы з нагамі. Маленькі раман з карцінкамі і гэтак далей.

Кот Грыпміна, імаверна лысы, шматгоддзе шархацеў у хмызах каля чыгуначнай станцыі Беларусь (некаторыя яго нават чулі!). А раптам выйшаў і паважна пайшоў да грамадскай прыбіральні. Далей толькі бяда, а па ёй скруха, і гэтак зноў і гэтак далей. Пастаноўка пытання: а ці магчыма даць дакладны адказ? Ізноў, гэта чарговая камедыя пра людзей маладых і не толькі.

Цімур Кудзеліч — пісьменнік і кніжнік з Мінска. Цяпер жыве і працуе ў Варшаве. Прыхільнік арганічнага авангарда і літаратуры ўмоўнасці. Аўтар кніг прозы «ЯК» і «Пацукі», і паэтычнага зіна «без гэтага — усё».