Ці прычыталі вы ўжо гэты бестселерны бестселер, які цяпер на ўсіх кніжных вітрынах свету? 😉 Я нядаўна прачытала і гатовая сфармуляваць крыху думак пра яго.

📙 Сцісла пра сюжэт: адна прыяцелька-літаратарка крадзе ў другой рукапіс новага рамана. Першая – не вельмі паспяховая, другая – вельмі паспяховая. Але акурат яна і памірае з-за няшчаснага выпадку. То чаму ўжо дабру прападаць?

👌🏼Гэта напраўду якасны літаратурны поп. Чытаецца хутка, лёгка, з большага захапляльна, казыча нервы, нагадвае, што людзі паўсюль аднолькавыя і ў кожнага маецца свой шкілет у шафе.

📚 Гэта гісторыя пра кніжна-літаратурны сусвет. Пра небачную звычайнаму чытачу кухню прыгатавання бестселера. Але адначасова яна пра чалавечую прыроду, якая роўна такая ж і ва ўсіх іншых прафесійных сферах. Людзі хлусяць, людзі крадуць, людзі зайздросцяць, людзі шукаюць сабе апраўданняў. Людзі любяць грошы і прагнуць славы. Людзям патрэбныя людзі.

🖤 Гэта гісторыя ў нейкі момант прыкідваецца ледзь не трылерам. І тады становіцца крыху вусцішна. Але ўсё ж яна пра унутраны свет чалавека, які зрабіў штосьці не вельмі добрае, ад чаго займеў багата розных прыемных бонусаў, а пасля – хвалю хейту, і спрабуе з гэтым неяк жыць.

💨 А яшчэ гэта кніга, у якой ні ў чым нельга быць пэўнай да канца. Бо галоўная гераіня (яна ж і апавядальніца) некалькі разоў мяняе ракурсы, па-рознаму расказвае пра адны і тыя ж падзеі і стасункі. Аўтарка па-майстэрску круціць чытачом і так, і сяк, што ў пэўны момант ты нават пачынаеш спачуваць гераіні.

👩🏻 Рэбека Кван – маладая аўтарка, у якой гэта ўжо далёка не першая кніга. То бок яна ведае, пра што піша. І мне былі дужа цікавыя ўсе гэтыя нюансы кнігавыдання ў заходнім свеце. Але, як мне падаецца, кнігу будзе цікава чытаць нават тым, хто далёкі ад кніжнага сусвету. Недзе ў сярэдзіне тэмп запавольваецца і ўвага крыху губляецца, зашмат становіцца аднастайных пакутаў гераіні. Канцоўка даволі нечаканая. Але не магу гарантаваць, што яна вас задаволіць 😎

❗І яшчэ: ні ў якім разе не чытайце рускамоўны пераклад! Чаму? Глядзіце ў інсце перакладчыцы 😁👇🏻

Водгук Кацярыны (@kniznyja_razmovy) з сайта bellit.store.