Апісанне

«Строй | Strój» — гэта выстава і каталог рэканструкцый гістарычнага і традыцыйнага адзення розных эпох Беларусі: ад велічных полацкіх княгінь да самабытных сялянак з Палесся. Усе строі адноўлены з навуковай дакладнасцю праз аўтэнтычныя тэхнікі — вышыўку, ткацтва, шытво і пляценне.

Як выглядала полацкая княгіня XI стагоддзя? Што магла насіць юная каралева Бона Сфорца? Які вобраз абірала шляхцянка ў драматычныя гады Паўстання 1863–1864 гадоў?

Колькі мільёнаў крыжыкаў трэба пакласці на палатно, каб адрадзіць традыцыйную беларускую кашулю з Калінкавічаў? Залататканыя шаўковыя стужкі, гарсэты і крыналіны, выкшталцоныя строі беларускіх сялянак, на стварэнне якіх сыходзяць месяцы і нават гады карпатлівай працы — усё гэта чакае вас на выстаўцы.

Кожны строй — гэта не проста мастацкі аб’ект, а вынік глыбокага навуковага даследавання. Усе мадэлі адноўлены з выкарыстаннем аўтэнтычных тэхнік: ад ткацтва і крою да тонкага пляцення і вышыўкі. Кожны элемент адзення і аксесуар мае адпаведнік у гістарычных крыніцах.

Натхніцеся талентам і густам нашых продкаў!