Дэбютны раман Яны Гульцяевай “Linea lateralis”. Кніга выйшла ў межах супрацы Міжнароднага саюза беларускіх пісьменнікаў з выдавецтвам Kamunikat.

«Хвароба перадаецца праз мову адмаўлення: яна пераходзіць у наступнае пакаленне праз сакрэты, абвінавачванні і хлусню», – такую думку пачула б Міра Ждановіч на сустрэчы ДДА – Дарослых дзяцей алкаголікаў. Міра, аднак, не паспела да іх дайсці: пэўным сонечным днём яна сустрэла незнаёмку, якая прапанавала ёй альтэрнатыўны спосаб самавызвалення. Сямейная сага, сацыяльна-псіхалагічная драма, замалёўкі-ўспаміны, эмігранцкі плач па страчаным доме, дзе разбіваліся сэрцы, дзе ніколі не жыло шчасце… ці ўсё ж такі жыло?

Яна Гульцяева — перакладчыца, скончыла аддзяленне паланістыкі філалагічага факультэта БДУ ў 2017 годзе. Адна з пераможцаў конкурсу апавяданняў “10+10: Мінск” (2018), выпускніца Школы маладога пісьменніка (2020). З 2021 года жыве ў Францыі, перакладае беларускую і французскую паэзію, кароткую прозу і драматургію.

“Слова маё служыць толькі праўдзе і толькі любові. Размотваючы клубок, разважаю: і ўсё ж любоў – панятак адносны, дый праўда ў кожнага свая, і часта зусім немагчыма паяднаць, прымірыць любоў і праўду. Але, клубок разматаўшы да канца, трымаючы пачатак ніткі ў руцэ, пераконваюся ў чарговы раз: любоў і праўда – рэчы вельмі простыя, рэчы адназначныя, асабліва калі прыміраныя. Свабода з імі быць – вось у чым векавечная складанасць…”.