Апісанне

У гэтай незвычайнай кнізе вас чакае аповед перадусім пра «Старт» з Оршы і «Тэмп» з Барані, якія доўга і паспяхова выступалі ў першынстве Беларусі ды іншых турнірах. Тут таксама багата звестак, статыстыкі і гісторый пра іншыя каманды, што баранілі на футбольных палях гонар Аршаншчыны: «Лакаматыў», «Станкабудаўнік», «Дынама», «Спартак», «Лёнакамбінат», «АвіяДар», «Колас» з Вусця.

• як развіваўся аршанскі ножны шпурляк ад самых першых спартыўных таварыстваў да сёння;

• як аршанцы ледзь не перамаглі ў першым неафіцыйным першынстве Беларусі;

• якая аршанская каманда была ўдзельніцай першага паядынку на новым стадыёне «Дынама» ў Мінску;

• у якіх сезонах за «Старт» гуляў сваяк класіка беларускай літаратуры Уладзіміра Караткевіча;

• якую мужчынскую дружыну на Аршаншчыне ўзначальвала жанчына;

• дзе з’явіўся першы ў Беларусі самаакупны клуб;

• як трэнеры дамовіліся з арбітрам і запоўнілі пратакол сустрэчы, якой насамрэч не было;

• цікавыя супадзенні і рэкорды на гульнях аршанскіх шпурляроў;

• рэдкія здымкі, шэраг якіх публікуецца ўпершыню;

• слоўнічак самабытнай беларускай спартыўнай лексікі.

Арцём Сізінцаў скончыў Інстытут журналістыкі БДУ ў Мінску і магістратуру беларускай філалогіі Варшаўскага ўніверсітэта. Працаваў у газетах «Всё о футболе», «Прессбол», на радыё «Сталіца» і ў шэрагу іншых выданняў. Ён — шматгадовы спартыўны блогер і часта выступае спартыўным экспертам у СМІ.

Кнігу «На „Старт“ і ў „Тэмпе“» ён пачаў пісаць з 2011 года: карпатліва збіраў звесткі з самых розных крыніц, працаваў у архівах, бібліятэках, размаўляў з колішнімі і цяперашнімі гульцамі, заўзятарамі, журналістамі, статыстыкамі.

Уладзімір Хільмановіч, журналіст, футбольны статыстык: Кніга Арцёма Сізінцава, прысвечаная гісторыі рэгіянальнага футбола, не мае, відаць, аналагаў у айчынным кнігадруку. Прынамсі мне не даводзілася бачыць падобнага выдання ў Беларусі і тым больш — на беларускай мове.

Вітаўт Руднік, журналіст і трэнер: Шмат цікавых гістарычных фактаў і знаходак, добрая мова, рупліва сабраная статыстыка, праца з многімі крыніцамі, усё напісана з беларусацэнтрычнай пазіцыі. Думаю, гэта будзе адна з найлепшых прац па гісторыі беларускага футбола.