Апісанне

Дзеянне «Рэспублікі глухіх» разгортваецца ў час палітычнай смуты на акупаванай тэрыторыі. Хоць месца і час дакладна не вызначаны, у гэтых жудасных падзеях лёгка пазнаць нашу эпоху і нашу краіну.

Гэтая ашаламляльная вершаваная прыпавесць па форме нагадвае драматычны твор. Яна адкрываецца сцэнай забойства акупантамі глухога хлопчыка Пеці. Стрэл, які падштурхоўвае жыхароў да пратэсту, — апошні пачуты імі гук. Горад глухне, і ў гэтай цішы мова жэстаў становіцца мовай іх маўклівага супраціву.

Кніга пераплятае гісторыі прыватнага жыцця ва ўмовах татальнага гвалту:

• Маладажоны Соня і Альфонса, якія чакаюць дзіця;

• Адважная Мамуля Галя, якая распачынае бунт у сваім лялечным тэатры;

• Лялечніцы, што ўдзень таемна вучаць гараджан мове жэстаў, а ўначы завабліваюць салдат за тэатральную заслону.

«Глухія не вераць у цішыню. Цішыню прыдумалі тыя, хто чуе».

Ілля Камінскі — нарадзіўся ў Адэсе, цяпер грамадзянін ЗША. Аўтар двух знакавых паэтычных зборнікаў («Dancing in Odessa» і «Deaf Republic»), адзін з найважнейшых пісьменнікаў свайго пакалення. Актыўна займаецца папулярызацыяй сусветнай паэзіі і перакладу.

Юля Цімафеева — беларуская паэтка і перакладчыца, аўтарка кнігі «Мінскі дзённік». Лаўрэатка прэміі Карласа Шэрмана за пераклад Стывена Крэйна.

Вальжына Морт — беларуская паэтка, жыве ў ЗША. Аўтарка кнігі «Песні для мёртвых і ўваскрэслых», якая атрымала прэстыжную International Griffin Poetry Prize. Выкладае ў Карнельскім універсітэце.